Performans, resim, vaqıt yönelişinde media, reberlik, ortaqlıqnı qaplap alğan, istimalden ösümlik medeniyetine qadar ve feminizmden çatışma bölgelerindeki yaşayışqa qadar mürekkep mevzularnı talil etken çeşit yönelişlerde çalışqan ressam. Ukrainada, Kıyivden 26 kilometr uzaqlığında Muzıçı qasabasında yaşay. 1973 senesi Ukrainanıñ Donetsk vilâyetinde Jdanivtsi qasabasında (o vaqıt ŞSCB) dünyağa keldi. Bu bölge kömür madenciliginen meşur oldı ve Sovet zamanlarından  başlap Rusiye ile Ukraina arasında ilân etilmeyip başlatılğan cenkke qadar sert ve qarışıq deñişmeler kördi. 

Alevtina Kahidze Kıyivde Tasviriy Sanat ve Mimarcılıq Milliy Akademiyasında (1999-2004) ve Felemenkte Jan van Eyck Akademiyasında (2004-2006) tasil aldı. 2018-den berli o, Birleşken Milletler Teşkilâtında Ukrainanı Tollerantlıq elçisi olaraq temsil ete, Ars Electronica tarafından “State of ART(ist)”  fahriy nişanı aldı, Avstriya tış işler nazirligi,  Women in Arts Award – 2023, UN Women Ukraine mukâfatlarına lâyıq körüldi, Kazimir Maleviç adına Artist Award 2008 ile Genç reber ve ressamlar yarışmasınıñ (Kıyiv, NaUKMA Zemaneviy sanat merkezi 2002) namzeti oldı. 

Kahidze bir çoq halqara ve ukrain sanat proyektlerinde iştirak ete, olar arasında eñ müimleri: Qırımnıñ Rusiye Federatsiyası tarafından işğali vaqtında Manifest 10 Halqara zemaneviy sanat bienalesinde, siyasiy mevzularnen bağlı 7-ncı Berlin bienalisinde iştirak etüv; Working for Change 54-ncı Venedik bienalisi çerçivesinde Mağrip pavilyonı içün leyqa, Ukrainada şahsiy proyektler - Pinchuk Art Centre merkezinde “Qapısız oda”, “Ya galereya” sanat merkezinde “Sen Volodımır Alevtina Syuzi Penelopanıñ evindesin”; Rinat Ahmetov ve “i3” grant programması sayesinde ömürge keçirilgen “Keç qalınamaycaq uçaqqa keç kalam” leyhası. Kahizde ayrıca Ukraina tarafından kontrol etilmegen topraqlarda ayat aqqında ikâye etken “Klubnika Andriyivna” leyhasınıñ müellifidir.

2023 senesi oktâbrniñ 24-nde Pragada Qırım platformasınıñ Ekinci parlament sammitinde Alevtina Kahidze "Making spaces" adlı performans ve sanat intervensiyasını taqdim etken yan tedbir keçirildi. Bu tedbirde "canlı resimler" yaratıldı, ressam Qırım tarihını eñ eski zamanlardan başlap yañıdan yaratqan edi.

Performativ tedbir çerçivesinde Kahidze Qırım tarihınıñ müim vaqialarını aks ettirdi. Performansnıñ soñunda ressam işğalciler tarafından Qırımğa qanunsız sürgün etilgenlerni añdı.