![image-project](https://cdn.prod.website-files.com/65d3647d54c54f73749531ac/65d3647d54c54f7374953249_1.jpg)
Saba saat 04:30, Qırım Muhtar Cumhuriyeti Yuqarı Şurasınıñ “yeşil adamlarnen” işğal etilmesiniñ birinci daqqaları. Olar, pulemötlarınen yerlilerniñ “pentagon” dep adlandırğan parlament binasına merkeziy kirişniñ basamaqlarında yata. Rusiye - bu onıñ arbiyleri olğanını soñra qabul etecek. Aqmescit, Ukraina. 27.02.2014
![](https://cdn.prod.website-files.com/65d3647d54c54f73749531ac/65d3647d54c54f7374953274_2.jpg)
“Yeşil adamlar” Qırım Muhtar Cumhuriyeti Yuqarı Şurasında asılğan Ukraina devlet bayrağını çıqara. Bir qaç daqqadan soñ, olar Rusiye bayrağını asacaq. Böyle etip, Qırımnıñ RF-nen işğal etilmesi başlandı. Aqmescit, Ukraina. 27.02.2014
![](https://cdn.prod.website-files.com/65d3647d54c54f73749531ac/65d3647d54c54f7374953275_3.jpg)
Rusiyeniñ bölgesinden çıqqan Mi-8 ve Mi-24 arbiy uçaqları Aqyardaki “Belbek” ava limanı tarafına uça. Birinci künlerde RF ordusı ögünde turğan esas vazife - Ukrainanıñ arbiy ava quvetlerini ve ava mudafaa quvetlerini areketsiz alğa ketirüv edi. Qırım, Ukraina. 02.03.2014
![](https://cdn.prod.website-files.com/65d3647d54c54f73749531ac/65d3647d54c54f7374953277_4.jpg)
“Yeşil adam” Avropanıñ eñ büyük ava limanlarından birisi, işğal etilgen Aqmescit ava limanında tura. Qırımğa Ukrainadan arbiy destek kelip olamasın dep, ruslar bu yerni işğalniñ ilk saatlerinde aldı. Qırım, Ukraina. Fevral 2014.
![](https://cdn.prod.website-files.com/65d3647d54c54f73749531ac/65d3647d54c54f7374953276_5.jpg)
“Yeşil adamlar” Ukraina arbiyleri tarafından teşkil etile bilecek silâlı tirenüvden qaçınmaq içün Aqyardaki Ukraina arbiy-deñiz quvetleri komandanlığınıñ ştabını zapt eteler. Qırım, Ukraina. Fevral 2014.
![](https://cdn.prod.website-files.com/65d3647d54c54f73749531ac/65d3647d54c54f7374953279_6.jpg)
“Yeşil adamlar” Qırımda Ukraina silâlı quvetleriniñ ava mudafaa komandanlığınıñ gizli sığınağı etrafındaki qoranıñ tellerini keseler. Olarnıñ maqsatları Ukraina arbiy qısımlarını blok etmek içün qullanılğan qoşma küçlerni taşığan Rusiye uçaqlarınıñ tüşürümemesini temin etmek edi. Yerli sakinlerniñ çoqusı evleriniñ yanında nasıl bir obyekt olğanını bilmey edi. Fevral 2014.
![](https://cdn.prod.website-files.com/65d3647d54c54f73749531ac/65d3647d54c54f7374953289_7.jpg)
“Yeşil adamlar” Aqmescit yanındaki Anğara qasabasında, Ukraina silâlı quvetleriniñ 36-ncı deñiz mudafaa brigadasınıñ territoriyası etrafındaki qora yanında adımlaylar. Bir saatten soñ olar yarımada eñ küçlü ukrain arbiy qısımlarından biriniñ qamaçavını başlaycaqlar. Qırım, Ukraina. 02.03.2014
![](https://cdn.prod.website-files.com/65d3647d54c54f73749531ac/65d3647d54c54f737495327e_8.jpg)
“Yeşil adam” RF arbiyleriniñ qurğan lageri yanında rus arbiy teknikası ögünde. Bu lager Anğara qasabasındaki Ukraina silâlı quvetleriniñ 36-ncı deñiz mudafaa brigadasınıñ territoriyası yanında Ukraina arbiylerini blok etmek içün quruldı. Qırım, Ukraina. 02.03.2014
![](https://cdn.prod.website-files.com/65d3647d54c54f73749531ac/65d3647d54c54f7374953299_9.jpg)
“Yeşil adamlar” Aqmescitniñ merkezinde ükümet binaları yanında nevbette turalar. İşğalniñ birinci künlerinden başlap şeernin merkezi aman-aman tamamınen qapatıldı. Qırım, Ukraina. Fevral 2014.
![](https://cdn.prod.website-files.com/65d3647d54c54f73749531ac/65d3647d54c54f7374953278_10.jpg)
Ukraina silâlı quvetleriniñ Aqyar Taktik Aviatsiya komandanı Yuliy Mamçur ile onıñ silâsız askerleri ve zabitleri Ukraina bayrağını alıp, “Belbek” arbiy qısmınıñ kirişlerini qapatqan “yeşil adamlarnıñ” qarşısına çıqalar. Uçaq alanı ondan evelki gece rus arbiyleri tarafından zapt etildi, o arbiyler anda olğan bütün arbiy uçaqlarnı bozdılar. Birazdan ruslar kolonnanı toqtatmaq içün avağa ateş açmağa başlaycaqlar. Kün devamında devam etken müzakereler neticesinde bölükniñ bir qısmını Ukraina kontrolü altına qaytaracaqlar. Aqyar, Qırım, Ukraina. 04.03.2014
![](https://cdn.prod.website-files.com/65d3647d54c54f73749531ac/65d3647d54c54f737495327b_11.jpg)
“Yeşil adam” o vaqıt endi rus arbiylerinen zapt etilgen “Belbek” uçaq alanına kirmege tırışqan Yuliy Mamçur ve onıñ silâsız askerlerinden ibaret olğan kolonnanı nişanğa ala. Aqyar, Qırım, Ukraina. 04.03.2014
![](https://cdn.prod.website-files.com/65d3647d54c54f73749531ac/65d3647d54c54f737495327c_12.jpg)
“Yeşil adamlarnen” Rusiye arbiy tehnikası kolonnanen Balıqlavada Ukraina sıñır bölügini zapt etmege kelgen. RF ordusına ait olğanlarını gizlemek içün ruslar arbiy tehnikasınıñ çoqusından nomeralarını çıqara edi. Aqyar, Qırım, Ukraina. 01.03.2014
![](https://cdn.prod.website-files.com/65d3647d54c54f73749531ac/65d3647d54c54f737495327a_13.jpg)
Balıqlavada Ukraina sıñır bölügine kiriş noqlasını özlerinen qapatqan papazlarnıñ ögünde “yeşil adam”. Aqyar, Qırım, Ukraina. 01.03.2014
![](https://cdn.prod.website-files.com/65d3647d54c54f73749531ac/65d3647d54c54f737495327f_14.jpg)
Rusiye arbiy uçaqları Keriç boğazınıñ üzerinden uçayatır - fotoresim Qara deñizde bulunğan gemiden yapılğan. İşğalniñ birinci saatlerinden başlap Rusiye bütün halqara añlaşmalarnı bozıp, Qırımğa bayağı arbiy küç yollamağa başladı. Keriç, Qırım, Ukraina. 03.03.2014
![](https://cdn.prod.website-files.com/65d3647d54c54f73749531ac/65d3647d54c54f737495327d_15.jpg)
“Yeşil adamlar” Aqmescitniñ merkezinde Ukraina arbiy qısmını elge keçire. Balalıqtan berli men qartanama keteyatqanda çok kere bu soqaqtan keçtim.Ve bir kün anda ellerinde silâ olğan rus askerleriniñ peyda olacağı iç bir vaqıt aqlıma kelmegen edi. Qırım, Ukraina. Mart, 2014.
![](https://cdn.prod.website-files.com/65d3647d54c54f73749531ac/65d3647d54c54f7374953280_16.jpg)
“Yeşil adamlar” Ukraina arbiy-deñiz quvetleriniñ 191-ncı oquv bölügi territoriyasında ruslarnıñ eline keçken silâlarnıñ çıqarılmaması maqsadınen ukrain arbiyleri tarafından qapığa qoyulğan zırhlı arabanıñ çekilmesini talap eteler. Aqyar, Qırım, Ukraina. Mart, 2014.
![](https://cdn.prod.website-files.com/65d3647d54c54f73749531ac/65d3647d54c54f737495329c_17.jpg)
“Yeşil adam” birinci kere balaklavasız, betini qapatmadan jurnalistlernen laf ete. Ve, rus askeri olğanını qabul ete. RF ordusınıñ askeri Keriç parom keçitini blok etken rusiye arbiy teknikası ögünde qonuşa. Keriç, Qırım, Ukraina. Mart, 2014.
![](https://cdn.prod.website-files.com/65d3647d54c54f73749531ac/65d3647d54c54f737495329b_18.jpg)
Rus zırhlı tehnikası kolonnasınıñ (70-ten ziyade araba) Aqmescitten Kefe tarafına keteyatqanını arabadan qayd etken video közetüv kamerasından alınğan parça. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f737495329a_19.jpg)
Ukraina deñiz zabiti “yeşil adamlardan” Ukraina arbiy-deñiz quvetlerine ait “Slavutıç” ve “Ternopil” gemileriniñ erkânları içün aş keçirilmesini talap ete. Gemiler limanda tura, rus askerleri ise limanğa ketken yollarnı qapattı. Aqyar, Qırım, Ukraina. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f73749532a6_20.jpg)
Rusiye arbiy kolonnası Aqmescitten çıqayatqanda Colman qasabası yanında Yalta yolundan areket etmekte. Bu kolonna Bu yoldan Qırımnıñ yalı boyuna barmağa istegen turistler arasında pek popülâr olğan dünyanıñ eñ uzun trolleybus yolu keçe. Men pencereden Qırımnıñ acayıp tabiatını zevqnen seyir etip, bu yoldan yavaş-yavaş trolleybusnen ketmege pek seve edim. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f737495329f_21.jpg)
“Yeşil adamlar” gece Kezlevde qamaçav altındaki ukrain arbiy qısmı yanında raat-raat nevbette turalar. Bu arbiy qısımda er bir rus uçağını tüşürme imkânına saip BUK-M1 zenit kompleksleri tura edi, onıñ içün bu arbiy noqta eñ baştan ücüm etilmege başladı. Qırım, Ukraina. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f73749532a0_22.jpg)
“Yeşil adamlarnı” ketirgen Rusiye arbiy yük maşnası Ukrainağa ait olğan “Belbek” uçaq alanına yolnı qapata. Aqyar, Qırım, Ukraina. Mart, 2014.
![](https://cdn.prod.website-files.com/65d3647d54c54f73749531ac/65d3647d54c54f737495329e_23.jpg)
Üstünde “Voyentorg” yazısı ve RF ordusınıñ resmiy işareti olğan ordu aş payını “KAMAZ” rus arbiy maşnasınıñ üstüne qoyğan “yeşil adam” sabalıq aşay. Qırım, Ukraina. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f73749532a8_24.jpg)
“Yeşil adamlar” Anğarada Ukraina silâlı quvetleriniñ 36-ncı deñiz mudafaa brigadası territoriyasına kirişlerni qapata. Rus askerleri tam bir qamaçav yapmağa tırışsa da, yerli sakinler ve göñülliler kene de qora üstünden ukrain arbiyleri içün aş yetkizmek içün yol tapa bildi. Qırım, Ukraina. Mart, 2014.
![](https://cdn.prod.website-files.com/65d3647d54c54f73749531ac/65d3647d54c54f73749532a2_25.jpg)
Zırhlı “Tigr” maşnası Anğara qasabasında “yeşil adamlar” tarafından tosmenge tutulğan Ukraina silâlı quvetleriniñ 36-ncı deñiz mudafaa brigadasınıñ qorası yanında tura. Bu maşnalar tek Rusiye ordusında bar. Qamaçav altında olğan ukrain arbiy qısımda bayağı zırhlı tehnika tutulğan, onıñ içün Rusiye ordusınıñ bir çoq askeri mında yiberildi. Qırım, Ukraina. Mart, 201
![](https://cdn.prod.website-files.com/65d3647d54c54f73749531ac/65d3647d54c54f73749532a1_26.jpg)
RF arbiy hızmetçileri Qırımda Doñuzlav gölü kirişinde işten çıqarılğan “Oçakov” gemisini batıra. Maqsat - gölde yerleşken Ukraina arbiy-deñiz quvetleriniñ Cenübiy flotu gemileriniñ deñizge çıqmasını blok etmek. Bundan evel daa üç gemi batırılğan edi. Novoozörnoye, Qırım, Ukraina. Mart, 2014.
![](https://cdn.prod.website-files.com/65d3647d54c54f73749531ac/65d3647d54c54f737495329d_27.jpg)
“Yeşil adamlar” “Belbek” uçaq alanı yanında arbiy maşnadan çıqayatır. Ruslar endi uçma-qondurma şeritini kontrol etse de, memuriy binalar daa ukrain arbiy hızmetçileriniñ elinde. Mart 2014.
![](https://cdn.prod.website-files.com/65d3647d54c54f73749531ac/65d3647d54c54f73749532a4_28.jpg)
Rus zırhlı araba, soñki daqqalarğace Ukraina arbiy hızmetçilerinen kontrol etilgen “Belbek” uçaq alanındaki Ukraina silâlı quvetleriniñ Aqyar taktik brigadasınıñ ştabı etrafında qoranı teşmege tırışa. Qırım işğalinden evel Ukraina yarımadasında RF ordusı tarafından kiralanğan bazalarda zırhlı tehnikanı aman-aman iç yoq edi. Mart 2014.
![](https://cdn.prod.website-files.com/65d3647d54c54f73749531ac/65d3647d54c54f73749532a5_29.jpg)
“Yeşil adamlarnı” taşığan rus arbiy yük maşnaları kolonnası Aqmescitten Aqyat tarafına areket etmekte. Qırımda böyle kolonnalarnıñ sayısı kün-künden arta edi. Qırım, Ukraina. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f73749532a3_30.jpg)
Rus arbiy hızmetçileri, artıq qaysı orduğa ait olğanlarını saqlamayıp, Ukrainanıñ balaban “Kostântın Olşanskıy” gemisini elge keçire. Martnıñ 21-nden başlap, gemi, Ukraina arbiy-deñiz quvetleriniñ başqa gemisi - “Çerkası” tarama gemisinen beraber mudafaa tutqan edi. Martnıñ 24 künü gemi erkânınıñ çoqusı Rusiye tarafına keçmeyip, gemini terk etti. Gemide 20 arbiy hızmetçi qaldı. Martnıñ 24-nde 200-ge yaqın RF askeri silâlı şekilde gemini zapt etti. Qırım, Ukraina. 24.03.2014
![](https://cdn.prod.website-files.com/65d3647d54c54f73749531ac/65d3647d54c54f73749532a7_31.jpg)
Ukraina silâlı quvetleriniñ operativ teminleme Baş İdaresiniñ Merkeziy arbiy-topografik ve navigatsiya idaresine ücüm vaqtında damda yatqan mergin nişancı “yeşil adamlar”. Birazdan işğalciler teymen Sergiy Kakurinni öldürecek ve daa bir ukrain zabitini yaralaycaqlar. Kakurin Qırım işğali vaqtında ukrain arbiyleri arasında birinci qurban olacaq. Bu künü işğalci yolbaşçılar Qırımnıñ RF terkibine kirgenini ilân etecekler. Aqmescit, Qırım, Ukraina. 18.03.2014
![](https://cdn.prod.website-files.com/65d3647d54c54f73749531ac/65d3647d54c54f73749532bc_32.jpg)
“Yeşil adamlar” Anğarada Ukraina silâlı quvetleriniñ deñiz mudafaa qısmınıñ yanında turalar. Yaqında bu qısım tamamıyla işğalciler tarafından zapt etilecek. Abriy tehnikanıñ bir qısmını RF Ukrainağa qaytaracaq, o da, çalışmağan alda olacaq. Ondan soñ ise, aprel ayında Donbasta rus tecavuzı başlanğan soñ bu ketişat toqtatılacaq. Qırım, Ukraina. 18.03.2014
![](https://cdn.prod.website-files.com/65d3647d54c54f73749531ac/65d3647d54c54f73749532c1_33.jpg)
“Yeşil adamlar” Doñuzlar gölünde, Novoozörnoye qasabasında bulunğan Ukraina arbiy-deñiz quvetleriniñ Cenübiy arbiy-deñiz bazasını elge keçireyatırlar. Bundan bir qaç daqqa evel qapı ve barrikadalar traktor vastasınen yoq etildi. Rus ve ukrain arbiyleri arasında muzakereler devam ete. Qırım, Ukraina. Mart, 2014.
![](https://cdn.prod.website-files.com/65d3647d54c54f73749531ac/65d3647d54c54f73749532be_34.jpg)
“Yeşil adamlarnı” taşığan rus zırhlı araba Kefede Ukraina arbiy-deñiz quvetleriniñ 1-nci deñiz piyadesi batalyonuna ücüm etmege kete. Qırım, Ukraina. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f73749532bf_35.jpg)
“Yeşil adamlar” “Belbek” uçaq alanında Ukraina silâlı quvetleriniñ Aqyar taktiv aviatsiya brigadasınıñ memuriy binasına ücüm eteyatqanda, içine ses granatasını atalar. Aqyar, Qırım, Ukraina. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f73749532c3_36.jpg)
“Yeşil adam” “Belbek” uçaq alanınıñ ücümı vaqtında, qan töküv başlanmaması içün işğalcilerniñ fikirlerini deñiştirmege tırışqan ukrain arbiyine bağıra. Bu fotoresim cenkleşmege maqsadı olmağan Ukrainanıñ, uzun vaqıt devamında ordu ihtiyacı olmağanından emin olğanını açıq-açıq ifade ete. Bu fotoresimniñ artında silâsız ve farqlı formalar kiygen ukrain arbiylerini körmek mümkün. Er daqqa cenkleşmege azır, zemaneviy silâ taşığan ve yañı formalar kiygen rus askerleriniñ yanında bu pek belli ola. Qırım, Ukraina. Mart, 2014.
![](https://cdn.prod.website-files.com/65d3647d54c54f73749531ac/65d3647d54c54f73749532c2_37.jpg)
Ukrainanıñ “Çerkası” tarama gemisi, Ukraina arbiy-deñiz quvetlerine ait olğan gemilerniñ açıq deñizge çıqıp olması içün Doñuzlav gölüne kirişte, ruslarnen batırılğan gemini çetke çekmege tırışa. Bu gemi eñ çoq (martnıñ 6-ndan 25-nece) rus askerlerinden özüni mudafaa etti ve bir qaç kere qamaçavdan çıqmağa tırıştı. Mart, 2014.
![](https://cdn.prod.website-files.com/65d3647d54c54f73749531ac/65d3647d54c54f73749532c4_38.jpg)
“Yeşil adam” gece saatlerinde keçken ücüm vaqtında esir alınğan ukrain deñiz piyade askerlerini qaravullay. Kefedeki 1-nci deñiz piyade batalyonı Qırımdaki ukrain arbiy qısımlar arasında eñ uzun mudafaa tuttı. Qırım, Ukraina. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f73749532c5_39.jpg)
Rus arbiy yük maşnaları Kefede esir alınğan ukrain deñiz piyade askerlerini arbiy qısımdan çıqara. Olar arasında tek üçte biri tezden işğal etilgen Qırımnı terk etecek ve hızmetini Ukraina silâlı quvetleri terkibinde devam etecek. Qırım, Ukraina. Mart, 2014
![](https://cdn.prod.website-files.com/65d3647d54c54f73749531ac/65d3647d54c54f73749532c0_40.jpg)
Rus qırıcıları Qırımnıñ cenübiy-ğarp tarafındaki Bel Avuz yalı şeritini nezaret ete. “Deñiz” sözü degenge, aqlıma bu yer kele. Mında men yaldamağa öğrendim. Mında ecdatlarımnıñ bir qaç nesili östi. Bu yalınıñ qumını men başqasınen iç qarıştırmam. Amma bularnıñ episi şimdilik tek hatıralarımızdadır. Ukraina. Mart, 2014.