Qırımtatar asıllı vesiqalı fotograf ve al-azırda ticariy olmağan teşkilatlar ve kütleviy matbuat vastalarınıñ inkişafı saasında çalışqan mustaqil mesleatçı. O, Özbekistanda dünyağa keldi. Onıñ ailesi 1944-te Qırımdan stalin rejimi tarafından anda sürgün etildi. Sovet Birliginiñ dağılmasından soñ Ukrainada öseyatqan qırımtatar, iqtisadiy ve siyasiy sistemalarnıñ dağılması neticesinde meydanğa kelgen insan aqqları bozuluvlarınıñ tesirini eñ başından kördi. İnsan aqqlarını qorçalama istegi onı içtimaiyat ve vesiqalı fotoresim zenaatına ketirdi. Emine, tecribelerini vesıqalı fotoresim, içtimaiyat, insan aqqları ve jurnalistika saalarında aks ettirdi. O, İvan Franko adına Lviv Milliy Universitetinde içtimaiyat saasında ve Ohio Universitetiniñ Vizual kommunikatsiya mektebinde fotoresim mühbirligi saasında magistr derecelerini qazandı. 2012-2017 seneleri arasında vesiqalı fotoresim ve jurnalistika saasında çalıştı. Ondan soñ Büyük Britaniyağa köçti, ticariy olmağan saada çalıştı, soñki vaqıtlarda Thomson Reuters Foundation teşkilâtında media mesleatçı olaraq çalıştı. Onıñ işleri Fulbright stipendiyası ve Magnum Emergency Fund Fellowship fondu stipendiyasınen desteklendi, leyhaları ise Ukrainada ve çetelde taqdim etildi.

Bu fotoresimler seriyası - 2014 senesi mart ayında Qırımnıñ Rusiye tarafından ilhaqından evel ve soñra qıyın geosiyasiy müitte ev tapqan qırımtatarlarnıñ tecribesini aks etken vizual ardı-sıra. Bu olğan soñ qırımtatarlar gruppa olaraq devletniñ siyasiy taqip etüv noqtasına qaytıp keldi. Bütün fotoresimler, siyasiy kerginlik artqan Qırımnıñ künlük ayatınıñ sessiz anlarını ve manzaralarını aks ettire. Ev duyğusı, devletniñ repressiv siyasiy maşinası ve propagandası ile beraber kelgen bir kerginlik ve qorqu duyğusı ile deñişe. 2008 senesinden 2021 senesine qadar Qırımda çıqarılğan fotoresimler.