Qırımtatar asıllı vesiqalı fotograf ve al-azırda ticariy olmağan teşkilatlar ve kütleviy matbuat vastalarınıñ inkişafı saasında çalışqan mustaqil mesleatçı. O, Özbekistanda dünyağa keldi. Onıñ ailesi 1944-te Qırımdan stalin rejimi tarafından anda sürgün etildi. Sovet Birliginiñ dağılmasından soñ Ukrainada öseyatqan qırımtatar, iqtisadiy ve siyasiy sistemalarnıñ dağılması neticesinde meydanğa kelgen insan aqqları bozuluvlarınıñ tesirini eñ başından kördi. İnsan aqqlarını qorçalama istegi onı içtimaiyat ve vesiqalı fotoresim zenaatına ketirdi. Emine, tecribelerini vesıqalı fotoresim, içtimaiyat, insan aqqları ve jurnalistika saalarında aks ettirdi. O, İvan Franko adına Lviv Milliy Universitetinde içtimaiyat saasında ve Ohio Universitetiniñ Vizual kommunikatsiya mektebinde fotoresim mühbirligi saasında magistr derecelerini qazandı. 2012-2017 seneleri arasında vesiqalı fotoresim ve jurnalistika saasında çalıştı. Ondan soñ Büyük Britaniyağa köçti, ticariy olmağan saada çalıştı, soñki vaqıtlarda Thomson Reuters Foundation teşkilâtında media mesleatçı olaraq çalıştı. Onıñ işleri Fulbright stipendiyası ve Magnum Emergency Fund Fellowship fondu stipendiyasınen desteklendi, leyhaları ise Ukrainada ve çetelde taqdim etildi.

"Qırım.Ev" leyhası fotoressamnıñ qorantasınıñ ve 2014 senesi mart ayında Qırımnıñ Rusiye tarafından işğal etilmesinden evel ve ondan soñra qıyın geosiyasiy müitte öz evini qıdırğan qırımtatar halqınıñ tecribesini aks ete. Ziyatdinova içün kamera ve diktofon cevap qıdırma aletleri oldı: Men kimim? Men qaysı yerge aitim? Ev ne demektir? Bu süaller oña keçmişteki ve şimdiki Qırımnıñ, qalğan sovet ve rus propagandasınen yoq etilgen ya da deñiştirilgen aileviy ikâyelerni aydınlatmağa imkân berdi. 1937 senesi kollektivizatsiyadan evel Qırımda toprqlarğa saip olğanı ve işçi tutqanı içün sovet akimiyeti tarafından taqip etilgen dede. Sözde nazilernen işbirlik yaptılar dep qabaatlanğan ve zorbalıqnen Merkez Asiyğa sürgün etilgen qartananen qartbaba; qıyın yollar, ağır şarait ve yaramay munasebetke dayanalmayıp ölgen aqrabalar. 1990 senesi vatanına qaytmaq içün sovet propagandasından keçken ana-baba.

Tarihiy malümat:
‍
Qırımtatarlar, Ukrainada, çoqusı allarda Qırım yarımadasında yaşağan, tahminen 250 000 - 300 000 kişini teşkil etken türkiy tilde laf etken ve İslâm dinini kütken tamır etnik gruppasıdır. Rusiye-Osmanlı cenki neticesinde, 1783 senesi II-nci Yekaterinanıñ yolbaşçılğında Rus imperiyasınıñ Qırımnı zapt etmesinden evel, qırımtatar ealisi Qırımda demografik çoqluqnı teşkil ete edi. O vaqıtlarda yarımadada Osmanlı Devletine ittifaqdaş olğan Qırım Hanlığı adlı devlet bar edi.

Rusiye imperiyasınıñ kelmesinen ve yañı memuriy ve idare sistemasınıñ qurulışınen, qırımtatarlar öz-özüni idare etüv sistemalarını aman-aman ğayıp ettiler. Bundan ğayrı, Qırım yarımadasındaki demografik vaziyet deñişmege başladı. Birinciden, qırımtatarlar bir qaç dalğanen çetelge icret etmege başladılar, çoqusı Türkiyege köçti. Ekinciden,   Rusiye imperiyası rus halqınıñ Qırımğa köçip kelmesine sebep olğan icret siyasetini keçirmege başladı. Bu ise, XX-ncı asırnıñ başında Rusiye imperiyası dağılğanda ve onıñ yerine Sovet Birligi kelgende, qırımtatarlarnıñ yarımadada çoqluq olmamasına yol açtı.

1944 senesi qırımtatar ealisi Stalin rejimi tarafından Qırımdan sürgün etildi, çoqusı Orta Asiyağa, bu cinayetlerni aqlamaq içün qırımtatarlarnıñ Ekinci Cian cenkinde Almaniyanen sözde işbirlik yapqanları aqqında uydurma qabaatlavlar tarqatıla edi. Sürgünlikte eki yıl devamında qırımtatar halqınıñ üçte bir qısmı elâk oldı.  

Yani bu eki vaqia - 1783 senesi II-nci Yekaterina tarafından Qırımnıñ istilâsı ve 1944 senesi Stalin rejimi tarafından qırımtatarlarnıñ sürgün etilmesi - rusiye ve sovet akimiyetleri tarafından Qırım aqqında yaratılğan tarihiy añlatuvlarnı pekitip, qırımtatarlarnıñ rollerini belgiledi. Bularnıñ episi yarımadada ruslarnıñ ükümdarlığını köstermek ve bir milletniñ insaniyetsiz sürgünini aqlamaq içün yapılğan edi. Böyleliknen, bu añlatuv qırımtatar halqınıñ aqlarını ve rusiye müstemleke idaresinden evel peyda olğan qırımtatar medeniyeti ve qurulışlarınıñ qıymetini azalta ediler. Buña qarşılıq olaraq olar defalarca yarımadada rusiyeniñ etnik ve medeniy üstünligini şekillendirmege tırıştı. Ondan ğayrı, qırımtatarlarnıñ pek çoq tarihiy vesiqaları ve arhivleri yoq etildi ya da ğayıp oldı, bu da Qırımnıñ tarihında slavân ve ruslarnıñ tesiri artmasına, qırımtatarlarnıñ ise bu tarihte añılmamasına sebep oldı.

Sovet zamanında çıqqan çeşit tarihiy ve media menbalarında kösterilgeni kibi, qırımtatarlar sovet ükümeti tarafından satqın ilân etilip sürgün etilmeden evel, farqlı devirlerde olar “ekzotik başqaları”, etnik çeşitlikniñ taşıyıcıları olaraq kösterile edi. 1990-ncı yıllarda qırımtatarlarnıñ qaytıp kelmesine izin berilgende, Ukraina ükümeti ve cemiyeti Qırım tamır halqı meselesinde çoqusı allarda körmemezlikke urdı.

2014 senesi Qırımnıñ Rusiye Federatsiyası tarafından işğal etilmesinden soñra çoq Ukraina vatandaşları qırımtatarlar aqqında fikirlerini deñiştirdi, olarnı zengin medeniy mirasqa saip olğan tamır halq olaraq körmege başladılar.  Lâkin, qırımtatarlarnıñ 2014 senesinden berli Rusiyege qarşı cenkte ittifaqdaş olaraq alğılanmasına baqmadan, Ukraina ealisiniñ çoqusı alâ daa qırımtatarlarnı “başqaları” olaraq körmege devam etti ve olarnıñ tarihınen özgünligini Ukrainanıñ tarih añlatuvı ve özgünlik konseptinen bağlamağa tırıştı. Aynı zamanda, Rusiye-Ukraina sıñırınıñ diger tarafında,  işğalci akimiyet qırımtatarlarnı bir taraftan devletniñ ektremist duşmanları, diger taraftan da Rusiye cümertliginiñ bahtlı “alıcıları” olaraq köstermege tırışa.

Ondan ğayrı, qırımtatarlar aqqında tarihiy añlatuvlar, kütleviy malümat vastalarındaki müzakereler kibi pek siyasiyleştirilgen.  Bu halq aqqında laf yürsetilgende er sefer çeşit süaller peyda ola: Qırım kimge ait? Ruslarğa, ukrainlerge ya da qırımtatarlarğamı? O, slâvan ya da türkiymi? Musulman ya da hristian dünyasına ait? İçinde ve etrafında tarihiy adiselerni başından keçirgen qırımtatarlarnıñ sesleri, tarihleri ve baqışları sıq-sıq yañlış tasavur etile ya da küçültile. Jurnalist olaraq 2014 senesi Qırımnıñ Rusiyenen işğal etilmesini aydınlatqan Emine Ziyatdinova, bu siyasiyleştirilgen añlatuvnıñ propagandağa, soñra ise zorbalıq aletine çevirilgeniniñ şaatı oldı.

Qırımtatarlarnıñ Qırımdaki tarihiy yerini ve tecribesini añlavda olğan qıyınlıqlar (şimdi bu topraqlarnı kontol etken) Rusiyeniñ “sovetlerden qalğan Ukrainanı” silme ya da yoq etme yönelişindeki tedbirleri sebebinden daa çoq kerginleşe. Bu ketişat çeşit şekillerde ola, olardan birisi - uydurılğan Rusiye-Qırım birligi ve umumiy tarihiy taqdir ile coğrafik ve mefküreviy taraftan esaslanğan añlatuvlar. Qırımnıñ bazı köy yerlerinde yarımadanıñ infrastrukturasını inkişat ettirmek içün rus işğalci akimiyetiniñ yapqan areketleri de aynı maqsatqa hızmet etip, qırımlılar içün birleşüv ne qadar müim olğanını köstergen daa bir hatırlatma olaraq qullanıla.